ಕಿರಿಕ್ ಮಾಡುತ್ತಲೇ ಕನ್ನಡಿಗರ ನಿದ್ದೆಗೆಡಿಸಿದ್ದ ನಟಿ ಸಂಯುಕ್ತ ಹೆಗ್ಡೆ ಸದ್ಯ ಬಾಲಿವುಡ್ ಅಂಗಳದಿಂದ ಸುದ್ದಿಯಾಗಿದ್ದಾರೆ. ರಶ್ಮಿಕಾ ಮಂದಣ್ಣ ಬಳಿಕ ಸಂಯುಕ್ತ ಹೆಗ್ಡೆ ಹಿಂದಿಯಲ್ಲಿ ಕಾಣಿಸಿಕೊಳ್ತಿದ್ದಾರೆ. ಹೌದು.. ಹಿಂದಿ ವೆಬ್ ಸೀರೀಸ್ ‘ಪಂಚ್ ಬೀಟ್’ನಲ್ಲಿ ಸಂಯುಕ್ತ ನಟಿಸಿದ್ದು, ಪಕ್ಕಾ ಜಂಕಿ ಪಾತ್ರವನ್ನ ನಿಭಾಯಿಸಿದ್ದಾರೆ ಅಂತ ಹೇಳಲಾಗ್ತಿದೆ. ಮೀಶಾ ಅಂತ ಈ ಪಾತ್ರಕ್ಕೆ ಹೆಸರಿಡಲಾಗಿದೆ.
ಹಿಂದಿ ವೆಬ್ ಸೀರೀಸ್ ‘ಪಂಚ್ ಬೀಟ್’ - ಸೀಸನ್ 2 ಇದಾಗಿದ್ದು, ಮುಖ್ಯ ಭೂಮಿಕೆಯಲ್ಲಿ ಸಂಯುಕ್ತ ಹೆಗ್ಡೆ ನಟಿಸಿದ್ದಾರೆ. ಈ ಬಗ್ಗೆ ನಟಿ ಸಂಯುಕ್ತ ಹೆಗ್ಡೆ ಇನ್ಸ್ಟಾಗ್ರಾಮ್ನಲ್ಲಿ ಪೋಸ್ಟ್ ಮಾಡಿದ್ದು, ‘ ತಮ್ಮ ನಿಜ ಜೀವನಕ್ಕೂ ಪಂಚ್ ಬೀಟ್ನ ಪಾತ್ರಕ್ಕೂ ವ್ಯತ್ಯಾಸವಿಲ್ಲ. ನಾನು ಹೇಗಿದ್ದೀನೋ ಹಾಗೇ ಇದರಲ್ಲಿ ನಟಿಸಿದ್ದೀನಿ’ ಅಂದಿದ್ದಾರೆ. ನಟ ಪ್ರಿಯಾಂಕ್ ಶರ್ಮಾ, ಸಮೀರ್ ಸೋನಿ, ನಿಖಿ ವಾಲಿಯಾ, ಕಾಜಲ್ ತ್ಯಾಗಿ, ನಿಖಿಲ್ ಹಾಗೂ ಇನ್ನೂ ಹಲವರು ನಟ-ನಟಿಯರು ಈ ವೆಬ್ ಸೀರೀಸ್ನಲ್ಲಿ ಕಾಣಿಸಿಕೊಂಡಿದ್ದಾರೆ. ಅಕ್ಷಯ್ ಚೌಬೆ ‘ಪಂಚ್ ಬೀಟ್’ ವೆಬ್ ಸೀರೀಸ್ಗೆ ಆ್ಯಕ್ಷನ್ ಕಟ್ ಹೇಳಿದ್ದಾರೆ. ನಿರ್ಮಾಪಕಿ ಎಕ್ತಾ ಕಪೂರ್ ನಿರ್ಮಾಣ ಸಂಸ್ಥೆ ಬಂಡವಾಳ ಹೂಡಿದೆ.
‘ಕಾಲೇಜ್ ಕುಮಾರ’ ಚಿತ್ರದ ನಂತರ ಯಾವುದೇ ಕನ್ನಡ ಸಿನಿಮಾಗಳಲ್ಲೂ ಕಾಣಿಸಿಕೊಳ್ಳದ ಸಂಯುಕ್ತ, ತಮಿಳು ಹಾಗೂ ತೆಲುಗು ಸಿನಿಮಾಗಳಲ್ಲಿ ನಟಿಸಿದ್ದರು. ಇದರ ಜೊತೆಗೆ ಹಿಂದಿಯ ರಿಯಾಲಿಟಿ ಶೋಗಳಲ್ಲಿ ಕಾಣಿಸಿಕೊಂಡು ಬಹಳ ಸುದ್ದಿಯಾಗಿದ್ದರು. ‘ಪಂಚ್ ಬೀಟ್’- ಸೀಸನ್ 2 ಇದೇ ಜೂನ್ 27ರಂದು OTTಯಲ್ಲಿ ಬಿಡುಗಡೆಯಾಗಲಿದೆ.